GRAVACIÓN DO CAPÍTULO "PAZÓ" O PRÓXIMO DOMINGO

Na mañá do vindeiro domingo gravaremos en Chancelas (o único lugar de rodaxe fóra do termo municipal de Pontevedra) as dúas escenas que compoñen o capítulo Pazó. Neste capítulo aparece o automóbil Renault Fréres que pertence á familia Pazó dende non se sabe cando. É o coche de maior antigüidade que se conserva en Galiza, foi construido en 1902 e a matrícula que é de época posterior é PO-2. Está en moi bo estado de conservación e co motor en orde de marcha.
Tamén aparecerá no filme un biciclo construido polo propio Sr. Pazó nos seus talleres, que inicialmente estaban onde hoxe está o edificio das barcas nas Corbaceiras, e onde entre outras moitas mecánicas se facían motores para as embarcacións de pesca.