GUIÓN DO CAPÍTULO "RETRATO DA FILLA ENFERMA"

Puido ser

Capítulo retrato da filla enferma

Personaxes: Castelao, grupo nunha mesa da cafetería diante de cafés e vasos de auga (catro ou cinco), Bastián, nai e filla en cama.

Localizacións: Café Moderno (Praza de San Xosé), interior dun cuarto.

ESCENA 1

Plano de lonxe dentro do Café Moderno. Castelao e outra xente están arredor dunha mesa do café, ao pouco tempo Castelao érguese.

Plano curto sobre o grupo. Castelao comeza a poñerse o gabán e despídese dos contertulios.

Castelao.- Xa son horas, que vai rematar o domingo e mañá hai traballo. Boas noites.

O grupo, sen levantarse.- Boas noites.

Castelao achégase ao colgador onde colle o seu chapeu e o bastón, en segundo plano aparece Bastián.

Castelao.- Que foi, Bastián?

Bastián.- Don Afonso, hai unha muller na porta que lle quere falar...

ESCENA 2

Porta do Café. Unha nai agoniada refirelle:

Nai.- Don Afonso, se vostede puidera... Miña filliña está na cama moi enferma e...

Castelao (lembra que é médico).- Mais eu non lle teño moita práctica, levo dende non sei cando sen exercer os meus estudos...

Nai.- Se fixese o favor, é tan importante para min. Eu quería un retrato da miña filla.

(Expresión de sorpresa de Castelao).

ESCENA 3

Cuarto con pouca luz e a filla encamada, nun lateral Castelao sentado nunha cadeira está a facer no seu caderno o retrato da enferma, a nai aos pés da cama vaise achegando para ver como vai a encomenda.

Despois dun tempo sen falar, Castelao remata o asunto e entrega á nai o debuxo.

A nai despois de miralo ben di:

Nai.- Ai! Miña filliña, non se parece nada. Señor, non se parece nada.

Fin